காரடை


காரடைநோன்பு ஒவ்வொரு வருடமும் மாசியும்,பங்குனியும் கூடும் நாளில் வரும்.இது கணவனின் நலன் வேண்டி அவரது நீண்ட ஆயுளுக்காக ஸ்ரீகாமாக்ஷி தேவியை வேண்டி மனைவியர் செய்யும் நோன்பு. திருமணமாகாத பெண்களும்,
குழந்தைகளும் கலந்து கொள்ளலாம். விரதம் இருக்க வேண்டிய தேவையில்லை.

'மாசிக் கயிறு பாசி படரும்' என்பது சொல்வழக்கு. அதனால் இதை பங்குனியில் செய்வதை விட மாசி மாதம் இருக்கும்போதே செய்ய வேண்டும்.

சாவித்திரி தன கணவன்
சத்யவானின் உயிரை
யமனிடமிருந்து மீட்க வேண்டி,காட்டில் கிடைத்த பொருட்களைக் கொண்டு இந்த நோன்பு செய்ததாக ஐதீகம்.

நோன்பு செய்யும் நேரம் வரை எதுவும் சாப்பிடாமல் விரதம் இருந்து, கிழக்கு பார்த்து சிறு கோலம் போட்டு,
வீட்டிலுள்ள பெண்களின் எண்ணிக்கைப்படி சிறு வாழைஇலை போட்டுவெற்றிலை,பாக்கு,வாழைப்பழம், வெல்ல அடை,உப்பு அடை, வெண்ணை இவற்றுடன் கழுத்தில் கட்டிக் கொள்ளும் மெல்லிய மஞ்சள் கயிறும் சுவாமி முன் வைத்து நிவேதனம் செய்து கழுத்தில் கட்டிக் கொள்ள வேண்டும். பின்பு சுவாமிக்கும், கணவருக்கும் நமஸ்காரம் செய்தபின்பு காரடையை சாப்பிட்டு விரதத்தை முடிக்க வேண்டும்.

நோன்பு செய்யும்போது சொல்ல வேண்டிய ஸ்லோகம்

'உருகாத  வெண்ணையும் ஓரடையும் வைத்து நோன்பு நோற்றேன்
ஒருநாளும் என் கணவன் என்னை விட்டுப் பிரியாமல் இருக்க வேண்டும்.'

சமஸ்கிருத மந்திரம்..
மந்திரம் தோரம் கிருஷ்ணாமி சுபகே !
ஸஹாரித்ரம் தராமி அஹம்!
பர்த்து:ஆயுஷ்ய ஸித்யர்த்தம் !
ஸூப்ரீதா பவ ஸர்வதா !

இதற்கு நிவேதனமாக வெல்ல, உப்பு காரடைகளைச் செய்வது வழக்கம். அதற்கான செய்முறைக் குறிப்பு..

தேவை
அரிசிமாவு-- 2 கப் (கொழுக்கட்டை மாவு தயாராகக் கிடைக்கிறது. அதை வாங்கிக் கொள்ளலாம்.)
வீட்டில் தயாரிக்கும் முறை...
21/2  கப்  பச்சை  அரிசியை  நன்கு   களைந்து  1/2  மணி  ஊற  வைத்து, வடிகட்டி  மிக்ஸியில்  மாவாக அரைக்கவும்.  அதை  வெறும்  வாணலியில் லேஸாக  சிவக்க  (கோலம் போட  வரும்  பதம்)  வறுக்கவும்.

தேவை
காராமணி-- 1/2 கப் (இரண்டுக்குமாக)
தேங்காய் -- 1
(ஒரு  மூடியை  வெல்ல  அடைக்காக  நறுக்கிக்  கொள்ளவும்.  அடுத்த  மூடியை  துருவிக்  கொள்ளவும்.)

செய்முறை
வெல்லஅடை
அரிசி மாவு--1 கப்
வெல்லம்-- 11/2  கப்
ஏலப்பொடி-- 1/2 தேக்கரண்டி
தண்ணீர்-- 2 கப்

காராமணியை  சற்று  சூடு  வர  வறுத்து,  15  நிமிடம்  நீரில்  ஊற  வைக்கவும்.  குக்கரில்  4  சத்தம்  விட்டு  வேக  விடவும்.

தண்ணீரைக்  கொதிக்க வைத்து  அதில்  வெல்லம்  போட்டுக்  கரைய  விடவும். வடிகட்டவும். கொதித்ததும்  அதில்  வறுத்த  மாவு,  நறுக்கிய  தேங்காய்த்துண்டுகள்,  வெந்த  காராமணியில்  பாதி,  ஏலப்பொடி,  4  டீஸ்பூன்  நெய்  சேர்த்து  மொத்தையாகக்  கிளறவும்.

இறக்கி  ஆறியதும்,  ஒரு  பெரிய  எலுமிச்சை  அளவு  உருட்டி  வடை  மாதிரி  செய்து  தட்டி,  நடுவில்  துளை செய்யவும்.

உப்பு  அடை
வாணலியில்  4,5 ஸ்பூன்  தேங்காய்  எண்ணை,  2  ஸ்பூன்  நெய்  சேர்த்து  அதில்  சிறிது  பெருங்காயம்,  கடுகு,  2மிளகாய் வற்றல், 2பச்சைமிளகாய்,கறிவேப்பிலை  தாளித்து  11/2  கப்  தண்ணீர்  விடவும்.  அதில்  1 கப் வறுத்த  மாவு, துருவிய  தேங்காய்,  வெந்த  காராமணி,  உப்பு  சேர்த்து  கெட்டியாகக்  கிளறி  வெல்ல  அடை  போலத்   தட்டி இட்லித் தட்டில் வைத்து அல்லது ஒற்றைத் தட்டிலோ வைக்கவும்.

குக்கரில் வைத்து 4 சத்தம் வரும்வரை வேகவிடவும்.
வெண்ணையுடன்  நோன்பு  செய்யவும்.

இவ்வருடம் காரடை நோன்பு இன்று மாலை 4 மணி முதல் 4 1/2
மணிக்குள் செய்ய வேண்டும்.

நோன்பு செய்யும்  மங்கையருக்கு வணக்கங்களும் வாழ்த்துக்களும்!

கருத்துகள்

கருத்துரையிடுக

இந்த வலைப்பதிவில் உள்ள பிரபலமான இடுகைகள்

5.காமிரா

படம்
...அப்பா அப்படியே இரு. ஒரு ஃபோட்டோ எடுத்துக் கொள்கிறேன்... என்றால்,... கொஞ்சம் இருடி! தலை வாரி, பவுடர் போட்டு, விபூதி இட்டு வருகிறேன்...என்று சோம்பல்படாமல் அலங்காரம் செய்து கொண்டு போஸ் கொடுப்பதை என்னால் மறக்க முடியவில்லையே அப்பா.  உன்னைப் பார்க்க ஆசை வரும்போதெல்லாம்  அந்த புகைப்படங்களைத்தான் பார்க்கிறேன்.
மேலும் படிக்கவும்

என் இனிய தோழி!

படம்
நாம் எங்கு சென்றாலும்,எத்தனை மகிழ்ச்சியாக இருந்தாலும் 'அப்பாடா' என்று நம் வீட்டில் வந்து படுக்கும் சுகம் இருக்கிறதே, அதற்கு இணையே கிடையாது! எத்தனை அசௌகரியங்கள் இருந்தாலும், வசதிக் குறைவுகள் இருந்தாலும் அது நம் சொந்த வீடு என்கிறபோது அவை காணாமல் போய் ஒரு நிம்மதி தோன்றுவதை எவரும் உணரலாம். சொர்க்கமே என்றாலும் நம்மூர் மட்டுமல்ல நம் வீட்டைப் போலவும் வராது! வங்கி அதிகாரியாக இருந்த என் கணவருடன் இரண்டு வருடங்களுக்கு ஒரு முறை மாற்றல்;  பல ஊர்களில், மாநிலங்களில்  வாசம். ஒவ்வொரு ஊரிலும் ஒவ்வொரு மாதிரி வீடு! நமக்கு வேண்டியபடி எந்த இடமும் இருக்காது. ஒரு வீட்டை சரி செய்வதற்குள் அடுத்த மாறுதல் வந்துவிடும். பணிக்குச் செல்லாத இல்லத்தரசியாக குடும்பப் பொறுப்பு, குழந்தைகள் படிப்பு, வீட்டு வேலைகள் என்று காலம் இறக்கை கட்டிப் பறந்த நாட்கள் அவை! ஆனாலும் சொந்த வீடு ஆசை மட்டும் மனதின் ஓரத்தில் இருந்து கொண்டிருந்தது. எனக்கு சின்ன வயதில் இருந்தே ஊஞ்சலில் ஆடப் பிடிக்கும். கும்பகோணத்தில் என் தாத்தாவின் வீட்டுக்கு செல்லும்போதெல்லாம் ஊஞ்சலில் ஆட எங்களுக்குள் (என்னுடைய மாமா, பெரிமா, சித்தி குழந்தைகளுடன் ) சண்டை
மேலும் படிக்கவும்

உண்மை..துணிச்சல்(100வரி)

படம்
  "ஏங்க குழந்தைகளோட எங்கேயாவது  போய்ட்டு வரலாமா" மாலதி கேட்டாள். "குழந்தைகளையே கேட்கலாம்" என்றான் IT கம்பெனியில் வேலை செய்யும் மாதவன். "ரமண், சுமன் இங்க வாங்க.  நாம ஜாலியா வெளிய எங்க போலாம்?" "ஹைய்யா..பீச்சுக்கு போலாம்பா" குழந்தைகள் சற்று நேரம் தண்ணீரில் விளையாடிவிட்டு மணலில் வீடு கட்டி அதில் அறைகளைத் தடுத்து உள்ளே நாற்காலி டி.வி. எல்லாம் செய்தார்கள். மாலதியும்  மாதவனும் தாங்கள் வாங்கப் போகும் வீடு பற்றி பேசிக் கொண்டிருந்தார்கள். "யார் வீடு அழகா இருக்குனு  அப்பா அம்மாவைக் கேக்கலாமா?"என்று  பெற்றோரை அழைத்தனர். மாதவன் ஐந்து வயது சுமனிடம் "ரமண் வீட்டில் இரண்டு பெட்ரூம் இருக்கு. உன் வீட்டில்  ஒரு ரூம்தானே இருக்கு" "நான் பெரியவனானதும் நீங்களும், அம்மாவும் நம்ம தாத்தா,பாட்டி இருக்கற ஹோமுக்கு போயிடுவீங்களே. அதனாலதான்"என்றதைக் கேட்டதும் இருவரும் சம்மட்டியால் அடிபட்டதுபோல் உணர்ந்தார்கள். உண்மையைச் சொல்லும் துணிச்சல் குழந்தைகளுக்கு மட்டுமே உண்டு.
மேலும் படிக்கவும்